Siste veka i september
skal Svein Sæter og eg besøke fire bibliotek på Sunnmøre
for å snakke om krigen
og diskutere kvifor
vi ikkje vert ferdige med han.
Svein Sæter (f 1960 frå Sunndalsøra)
har mellom svært mykje anna
gitt ut over 20 sakprosabøker
sidan debuten i 1996,
og fleire av desse sirklar rundt
dramatiske hendingar frå andre verdskrigen.
Det er nok å nemne
"Spion i Hitlers rike" (2006),
om agenten Sverre Bergh, basert på
intervju med han rett før han døydde,
"Operatøren" (2008),
om tungtvatnsabotøren og Kon Tiki-fararen Knut Haugland,
og "Krig. Mor. Bror" (2019),
om broren hans, Ottar Haugland, sin kamp mot
nazismen, som førte han til
konsentrasjonsleirane i Tyskland.
For min eigen del
gav eg i 2009
ut krigsdokumentaren
"Himmelen over Shetland. Historier om motstand og eksil 1940-45",
men både romanane "Livingstones retrett", "Vegen til Neverland",
"Brevet til Rosalin" og "Aldri kome tilbake", i tillegg til
fjorårets novellesamling "Krighistorier",
har krigen som bakteppe.
Faktisk innser eg no
at dei fleste av dei 12 skjønnlitterære bøkene mine,
jamvel fleire dikt og noveller,
på ein eller annan måte
har trådar attende til krigen,
og dei farar, utfordringar og dilemma han skapte,
noko som vel avspeglar kor viktig denne tidsbolken
har vore sjølv for oss
som vart fødde
10-15-20 år etter at han tok slutt.
Eg ser verkeleg fram til desse samtalane med Svein,
sjølv om eg ikkje kan love
at vi kjem fram til noko endeleg
svar på spørsmålet
"Skal vi aldri bli ferdige ...?"
Sjå linken frå Nynorsk kultursentrum her:
Andre blogginnlegg om krigen:
https://oysteinorten.blogspot.com/2020/05/maidagar-overtakingar.html
https://oysteinorten.blogspot.com/2021/04/thermopylae.html
https://oysteinorten.blogspot.com/2021/05/fenrik-stal-og-willy-brandt.html
https://oysteinorten.blogspot.com/2020/04/ei-lita-historie-om-krigen.html
