Den seine vinteren her i nordvest
fyller påskeveka med ein tradisjonell miks av aktivitetar.
Sol og blå himmel avløyser no og då bygene frå nord
og gir oss mulegheiter for kaffi og kryssord på altanen
før skisporet lokkar deg ut
og dreg deg runde etter runde
i mildt sagt omskifteleg ver.
Born og dyr likeeins.
Sidan blir det krim på TV.
Det er britiske seriar.
Whitechapel. Forhandlaren.
Er det ikkje rart kor etterforskingar av drap tiltrekkjer oss.
Vi vil gjerne oppklare mysteriet.
Finne syndaren.
Kjenne oss att i det svake og svikefulle.
Før vi dømer.
Til slutt blir det lesing.
Lagerkvist sin Barabbas er eit årleg rituale.
Romanen er som eit vrengt evangelium.
Påska fortald gjennom mordaren som gjekk fri.
Forskarane meiner forresten at Jesus vart krossfest tredje april.
Altså i dag.
Kanskje ikkje så rart då at snøen kjendest krammare
på skituren i stad.
Det var som om det låg ein høgtidleg lovnad om vår inne i han.
Ingen kommentarer:
Legg inn en kommentar